«دليل تك»

المستويات الوظيفية

«مستويات المطورين»

مرجع لتحديد مستواك الحقيقي، مش شهادة.

قبل ما تبدأ

ده مقياس سلوك مش مقياس معرفة. إحنا مش بنسألك بتعرف إيه — بنسألك بتشتغل إزاي. الفرق ده مقصود، لأن المطور اللي بقاله ٨ سنين وبيستنى حد يقوله يعمل إيه لسه mid مهما كانت التكنولوجيا اللي في إيده.

السياق بيفرق. نفس الشخص ممكن يبقى senior في شركة ٢٠ فرد وmid في شركة ٥٠٠. ده مش تناقض — الشركة الكبيرة عندها طبقات أكتر ونطاق أوسع. استخدم الجدول ده عشان تعرف نفسك، مش عشان تطابق لقب.

الشركات بتسمّي المستويات بطرق مختلفة. في شركات مفيهاش Staff أصلاً، وفي شركات اسمها Senior على حاجة إحنا بنسميها Mid. اللقب مش هو المقياس.

المحاور الخمسة

كل مستوى بيتحرك في الخمسة مع بعض، مش في واحد بس. لو إنت متقدم في واحد ومتأخر في التلاتة الباقيين، إنت لسه في المستوى الأقل.

المحوربيقيس إيه
الاستقلاليةمحتاج قد إيه حد يفكرلك ويتابعك
حجم المهمةأكبر حاجة تقدر تمسكها من أولها لآخرها
التعامل مع الغموضبتستنى مواصفات كاملة، ولا بتوصل لها بنفسك
الأثر على غيركبتسلّم شغلك بس، ولا بترفع مستوى اللي حواليك
القرار التقنيبتنفّذ اختيارات، ولا بتاخدها وتتحمل نتيجتها

قيس مستواك

المستوى ٠١

Junior

بيتعلم إزاي يشتغل داخل فريق. الشغل الأساسي هنا إنك تبني عادات صح، مش إنك تنتج كتير.

الاستقلاليةبياخد task محددة وبيخلصها بمتابعة. لما يقف، محتاج حد يحركه
حجم المهمةtask واضحة: شاشة، endpoint، إصلاح bug، تعديل موجود
الغموضمحتاج المواصفات مكتوبة. الغموض بيوقفه
الأثر على غيرهشغله بيتراجع بالكامل. بيتعلم من المراجعات
القرار التقنيبينفّذ اختيارات غيره وبيسأل عن السبب

علامة إنك عدّيت المستوى ده

لما تخلّص task كاملة من غير ما حد يراجع كل سطر، وتبقى بتقول «أنا واقف في كذا» في نفس اليوم بدل ما تفضل ساكت يومين.

المستوى ٠٢

Mid-level

بيشتغل لوحده على حاجة كاملة. لسه بيستنى حد يحدد الاتجاه، بس مش محتاج حد يقعد جنبه.

الاستقلاليةبياخد feature ويسلّمها. بيسأل لما يحتاج، مش لما يقف
حجم المهمةfeature متوسطة بتعدّي أكتر من طبقة (UI + backend + data)
الغموضبيسأل الأسئلة الصح قبل ما يبدأ، مش بعد ما يخلّص نص الشغل
الأثر على غيرهبيراجع code زمايله وبيدي ملاحظات مفيدة
القرار التقنيبينفّذ وبيقترح بدايل، وبيعرف يشرح المقايضة

علامة إنك عدّيت المستوى ده

لما تاخد قرار معماري ويعيش أكتر من ٦ شهور من غير ما حد يضطر يرجع فيه.

المستوى ٠٣

Senior

مسؤول عن system مش عن task. الفرق الأساسي هنا إن الأسئلة بقت بتيجي ليه مش منه.

الاستقلاليةمحتاج توضيح اتجاه بس، مش خطة. بيقسّم الشغل بنفسه
حجم المهمةsystem كامل أو منتج فرعي، وبيمسكه من التصميم للتشغيل
الغموضبياخد متطلبات ناقصة ويطلع منها خطة قابلة للتنفيذ
الأثر على غيرهبيرفع مستوى الفريق. بيعمل mentoring وبيوثّق
القرار التقنيبياخد القرار، بيوثّقه، وبيتحمل نتيجته لما تبوظ

علامة إنك عدّيت المستوى ده

لما تبقى بتقول «لأ» لطلبات وتشرح تكلفتها بأرقام، والناس تقتنع. ولما الفريق يسألك قبل ما ياخد قرار، مش بعده.

المستوى ٠٤

Staff

نادر في السوق المحلي — في شركات كتير مفيهاش المستوى ده أصلاً

شغله مش في فريق واحد. بيحل مشاكل الفرق مش شايفاها لأن كل فريق شايف جزئه بس.

الاستقلاليةبيدوّر على المشكلة بنفسه. محدش بيديله شغل
حجم المهمةمشكلة عابرة للفرق: أداء، توحيد، منصة مشتركة، technical debt متراكم أو تعقيدات في الـcode
الغموضبيكتشف المشكلة قبل ما حد يطلبها، وبيقنع الناس إنها مشكلة
الأثر على غيرهبيغيّر طريقة شغل ناس مش في فريقه ومش تابعين له
القرار التقنيبيحدد الاتجاه التقني، والأهم — بيمنع قرارات غلط قبل ما تحصل

علامة إنك عدّيت المستوى ده

لما شغلك يتقاس بتأثيره على فرق تانية، مش باللي إنت سلّمته بإيدك.

المستوى ٠٥

Lead / Principal

نادر في السوق المحلي — بيظهر في الشركات الكبيرة أو المنتجات العالمية

قراراته بتحدد تكلفة وسرعة الشركة لسنين. التقنية هنا بقت أداة للبيزنس مش غاية.

الاستقلاليةبيشتغل على مستوى الشركة أو المنتج كله
حجم المهمةمشاكل ليها أثر مباشر على الفلوس والسرعة والتوظيف
الغموضبيحدد إيه المشكلة اللي تستاهل أصلاً، مش بس بيحلها
الأثر على غيرهبيبني ناس بتبني ناس. أثره بيتضاعف من غيره
القرار التقنيقراره بيتحول لسياسة، وبيتراجع بعد سنين مش شهور

علامة إنك في المستوى ده

لما القرار التقني بتاعك يظهر في الميزانية أو في خريطة المنتج.

مقاييس مضللة

سنين الخبرة — لوحدها مش مؤشر. ٥ سنين في نفس نوع الشغل ممكن تضيف أقل من سنتين في مشاكل مختلفة. اللي بيفرق تنوع المشاكل، مش عدد السنين.

اللقب — بيتأثر بسياسات كل شركة — في شركات بتديه بدل الزيادة. عشان كده مش دايماً بيعكس المستوى الفعلي.

عدد التكنولوجيات — العمق في تكنولوجيا واحدة بيقول أكتر من المعرفة السطحية بعشرة. المحاور بتقيس طريقة الشغل، مش عدد الأدوات.

السرعة — بتتقاس مع الجودة، مش لوحدها. التسليم السريع اللي بيسيب technical debt أو تعقيدات في الـcode بيقلل الأثر على المدى.

إزاي تستخدم ده

لو بتقيّم نفسك — اقرا المستوى اللي فوقك واحد، وشوف أنهي محور فيه إنت بعيد. المحور ده هو خطتك للسنة الجاية.

لو بتوظّف — استخدم المحاور كأسئلة interview بدل أسئلة المعرفة. «احكيلي عن قرار تقني أخدته وبَظ» بتكشف المستوى أكتر من أي سؤال عن syntax.

لو بتفاوض — لو شغال على مستوى أعلى من لقبك، دي حجتك. اربطها بأمثلة مش بمشاعر.